Ginatinguhaan sang alkalde sa ciudad sang Bacolod nga madugangan ang operational nga traffic lights.
Voice clip: Bacolod City Mayor Greg Gasataya
Sa pahayag ni Bacolod City Mayor Greg Gasataya, lima na ang napagana nila nga mga traffic lights sumugod nakaligad nga semana.
Paathag sini nga sa inaugural address sini bilang Mayor, ginpromisa niya nga mapasiga ang lima ka mga traffic lights nga iya na natuman.
Apang sa karun target pa nila nga ini ang madugangan sang apat ukon lima kalakip na ang traffic light sa triangle nga target mapaandar karun sa gab-i.
Isa pa sa luyag gid nga mabutangan sang traffic lights ni Mayor Greg amo ang Bangga Awing, nga malapit sa Rizal Elementary School, Education and Training Center School (ETCS) kag Negros Occidental National High School (NOHS) bangod dako nga risgo sa mga estudyante kun wala sang traffic light.
Madumduman nga ginpamalos ang pila ka mga traffic lights sa ciudad sang nakaligad agud kay-uhon kag temporaryo nga ginman anay sang mga traffic enforcers ang mga crucial intersections.
Paathag ni Mayor Albee nga ang ginpaandar nga mga traffic lights ang indi brand new, sa baylo ini ang ginreprogram lamang.
Ini bangod madamo sa mga traffic lights sadto ang wala sang yellow lights kag guba ang timer, gani ang nagasiga lamang amo ang deretso nga green to red vice versa, nga tuman ka delikado bangod wala sang warning.
Sa pihak sini, plano pagid sang Bacolod City Government nga makaprocure sang dugang AI powered traffic lights, nga indi lamang magabase sa program kun ano kalawig antes magshift sang color.
Sa baylo mahimo na magbaylo kun makita nga wala na sang salakyan sa pihak nga lane, ukon pwede nga magdesisyon kun diin ang prayoridad depende sa kadamuon sang nakapila nga salakyan.
