Nagpagwa sang dugang nga mga requirements ang Bacolod City para sa mga magabalik sa ciudad sini nga tuig 2021.
Sa Executive Order No. 1 Series of 2021 nga ginpagwa ni Mayor Evelio “Bing” Leonardia, ang mga returning overseas Filipino workers (OFWs) kag returning overseas Filipinos (ROFs) ang kinahanglan nga may yara sang coordination sa Overseas Workers Welfare Administration (OWWA) ukon Department of Foreign Affairs antes ini magbalik sa Bacolod.
Kinahanglan man nga magpaidalum ang mga ini sa RT-PCR test pag-abot sa Manila kag kinahanglan nga maquarantine tubtob nga magwa ang negatibo nga resulta.
Pag-abot sa ciudad, pagatsekyaron ang ila mga dokumento kag igaverify.
Ang mga Bacolodnon nga nagikan sa mga pungsod nga may yara sang travel restrictions santo sa national interagency task force (NIATF) ang igaquarantine sang pito pa gid ka adlaw.
Kinahanglan man nga may yara sang BACTRAC ID, online health declaration form kag dapat nakacoordinate ang mga ini kay Councilor Israel Salanga.
Para naman sa mga locally stranded individulas (LSI), kinahanglan sang negatibo nga RT-PCR test nga ginkuha tatlo ka adlaw antes ang date sang travel, letter of coordination nagikan sa opisina ni Councilor Cindy Rojas kag joint task force COVID-19 travel authority ukon medical certificate kag barangay clearance nagikan sa LGU of origin.
Kinahanglan man sang BACTRAC ID kag online health declaration form.
Para sa non-essential travel, dapat may yara sang negatibo nga RT-PCR test nga ginkuha tatlo ka adlaw antes ang date of travel, travel itinerary para sa kalawigon sang pagtinit sa Bacolod, g joint task force COVID-19 travel authority ukon medical certificate kag barangay clearance nagikan sa LGU of origin, confirmed booking sang accomodation sa Bacolod City, round trip ticket ukon travel details, BACTRAC ID kag online health declaration form.
Nagpahanumdum man ang local government nga pag-abot sa ciudad, tanan nga persona ang dapat nga magcoordinate sa ila tagsa-tagsa ka mga barangay paagi sa expanded barangay health emergency response teams (E-BHERTS).
Samtang, tinutuyo sang Executive Order No. 1 series of 2021 ukon ang consolidated guidelines for travel into the city of Bacolod amo nga mapabilin ang quarantine status sang ciudad sa Modified General Community Quarantine (MGCQ) kag maproteksyunan ang Bacolod sa bag-o nga variant sang COVID-19.
Sa interview sang Bombo Radyo Bacolod kay Dr. Chris Sorongon, deputy for medical services sang Emergency Operations Center, ginpahayag sini nga luyag sang city government nga masustiner ang manubo nga kaso sang coronavirus sa Bacolod kag indi masudlan sang bag-o nga variant agud nga magpadayon lang sa new normal ang pangabuhi sang Bacolodnon kag magsige-sige ang ekonomiya.
Nahibaluan nga may nadetect na nga kaso sang UK variant sa Metro Manila.
Suno kay Sorongon, dapat magpangaman ang ciudad ilabi na nga kada adlaw may naga-abot nga mga returning residents nagikan sa Manila gani dapat mas istrikto ang travel guidelines agud nga malikawan nga masudlan sang bag-o nga variant.
Apang liwat naman nga ginpahanumdom ni Sorongon nga bisan may yara pa sang consolidated travel guidelines ang ciudad, indi gid dapat magpakampante kag iobserbar ang ang basic health protocol.
Samtang, ginkumpirmar naman sini nga magalunsyar ang City Health Office sang online system para sa mga travelers nga nagakuha sang health certificate agud nga indi na sila magpadulong pa sa CHO kag mag-expose sa iban nga mga tawo.
