Ginpahayag sang pinuno sang Bacolod Traffic Authority Office (BTAO) nga sa Lunes pa sila magaumpisa magapanakop sa mga etrike nga yara sa major roads sang ciudad sang Bacolod.
Sa interview sang Bombo Radyo Bacolod kay Patrick Leonard Lacson, natapos na ang grace period nga ginhatag sang alkalde para sa mga etrike operators nga nagabiyahe sa major roads nga indi pagpangdakpon kag pagticketan.
Apang suno kay Lacson, nag-ayo ini kay Bacolod City Mayor Alfredo “Albee” Benitez nga magahatag pa ini sang weekend allowance.
Suno diri, subong nga adlaw sang Biyernes, bwas, Sabado kag sa Domingo, indi lang sila magpanakop kundi magahatag lamang sang warning agud nga indi magulpihan ang mga etrike operators sa dakpanay.
Ginpahayag sang BTAO Head nga sa Lunes nalang sila magapanakop sang mga etrike kag ebike nga nagalapas sa pagsulundan kag maga-issue sang citation tickets.
Panugyan man sini sa mga naregistered etrike operators sa tagsa ka barangay sa ciudad nga sundon lamang ang routa nga ginhatag sang Barangay kag indi na maglapas agud nga makapadayon ang mga ini sa ila palangabuhian.
Aminado man si Lacson nga may mga routa sa ciudad nga indi masulod sang iban nga salakyan kag ang etrike lamang ang makabiyahe.
Kinahanglan na sa karun nga maregulate ang mga etrike ilabi na nga nagakuha ini sang pasahero kag nagaapekto sa iban nga sector nga rehistrado kaangay sang tricycle.
