Ginahalad sang Bacolodnon nga Rank 3 sa Medical Technology Licensure Examination sa Ginoo, kag sa tanan nga nagsuporta ang iya nga kadalag-an.
Sa interview sang Bombo Radyo Bacolod kay Ralph Jason Tulmo, residente sa Barangay Villamonte kag graduate sa Riverside College, dako ang nangin papel sang pagpangamuyo kasubong man sang Excellero Review System, ang iya nangin review center gani siya ang nangin Rank 3 sa pasinawan.
Aminado ini nga target sini nga mangin Top 1, apang dako na nga butang para sa iya ang Rank 3 ilabi na nga mabudlay ang exam.
Pahayag sini nga handom gid sini nga mangin doktor kag wala nagsulod sa pinsar sini sadto ang magkuha sang pre-med course nga medical technologist, apang ini ang ginsuhestyon sang iya amay.
Ang amay ni Tulmo ang Top 1 sa 1985 Medical Technology Licensure Examination, kag karun isa na ka neurologist samtang ang iloy naman sini ang isa ka dentist.
Pahayag sini nga halos adlaw-adlaw gid ini nga nagareview sang iya nga mga notes kasubong man nagapangamuyo antes paman ang pagsalang sa pasinawan.
Ang Medical Technology Licensure Examination 2024 ang ginpatigayon sang Marso 21 kag 22 kun sa diin siya ang nagtake sang exam sa Iloilo.
Samtang yara sa exam, aminado si Tulmo nga ini ang nabudlayan kag dako ang pagpasalamat sini sang makalab-ot sa last question, gani para sa iya ang makapasar ang dako na nga butang bisan pa nga indi ini makasulod sa Top 10.
Suno kay Tulmo, magapahuway ini anay, samtang plano man niya nga magbulig sa review center.
Kasunod sini, plano man niya nga magpadayun sa medical school agud matuman ang handom nga mangin doktor.
