Disiplina lamang sa kaugalingon ang sekreto sang isa ka Negrense boxer nga nakasulod na sa semi-finals sang men’s boxing flyweight division sa nagapadayon nga Southeast Asian Games 2019 matapos sini nalutos ang Indonesian boxer nga si Aldoms Sugoro sa majority decision nga 4-1.
Sa interview sang Bombo Radyo Bacolod kay Rogen Ladon nga tumandok sang Bago City, Negros Occidental, ginpahayag sini nga tuman gid ang iya kalipay nga nagdaog siya sa elimination round.
Suno diri, ginahalad niya ang iya kadalag-an sa Ginoo, sa pungsod kag sa iya nga pamilya.
Nagalaom man ini nga padayon siya nga suportahan sa iya nga hampang sa semi-finals sa Disyembre 8 batok sa Singapore. Samtang, suno naman sa coach sini nga si Roel Velasco, mahapos lang tudluan si Ladon gani nga indi mabudlay nga magdaog ini.
Nagpasalig naman si Velasco nga indi sila magpakumpyansa apang nagapati ini nga makuha gid ni Ladon ang kampeonato. Nahibaluan nga si coach Roel ang utod sang Olympiad nga Bagonhon nga si Onyok Velasco.
