Nagsanyog na sa Tropical Storm category ang Bagyo OPONG nga nakasulod sa Philippine Area of Responsibility alas-5:00 kahapon sang hapon bilang Tropical Depression.
Ang sentro sang mata sang Bagyo ang ulihi nga nasiplatan sa 855 km sa nasidlangan sang Northeastern Mindanao.
Dala sini ang kabaskugon sang hangin nga nagadangat sa 65 km/h kag pagmadlos nga tubtob 80 km/h, samtang ini ang nagahulag padulong sa West Southwestward nga dereksyon sa kadasigon nga 20 km/h.
Wala pa sang nakita nga derekta nga epekto sa pungsod ang Tropical Storm OPONG sa masunod nga 24 oras, apang ini ang ginalantaw nga magadala na sang madamol nga mga pag-ulan humalin bwas Setyembre 25.
May posibilidad naman nga magpanaog sang Wind Signal No. 1 sa northeastern Mindanao, Eastern Visayas, kag Bicol Region subong nga adlaw.
Samtang ang pinakamataas nga Signal nga mahimo nga idagdag ang ginalantaw magadangat sa Wind Signal No. 3, kun sa diin ginalantaw nga mahimo magbaskog ang Bagyo sa severe tropical storm category.
Pabaskugon naman sang Tropical Storm OPONG kag Super Typhoon NANDO nga yara na sa gwa sang PAR ang Southwest Monsoon ukon Hangin Habagat.
Ini ang ginalantaw nga magadala sang mabaskog kag mamadlos nga huyop sang hangin partikular na sa dako nga bahin sang Luzon, Western Visayas, Surigao del Norte, kag Dinagat Islands.
Sa latest track kag intensity forecast, ang Tropical Storm OPONG ang ginalantaw nga magashift sa paghulag padulong sa west northwestward nga dereksyon samtang ini ang nagahilapit sa Eastern Visayas ukon Southern Luzon area.
Ginalantaw ang posibilidad nga magalandfall ang Bagyo sa Bicol Region sa Biyernes sang hapon.
Samtang ginalantaw naman nga tabukon sini ang kadutaan sang Southern Luzon humalin sa Biyernes sang hapon tubtob Sabado sang aga.
Ang Bagyo OPONG ang ginalantaw nga makagwa naman sa PAR sa Sabado sang gab-i ukon Domingo sang aga.
Sa pihak nga bahin, napabilin naman ang kabaskugon sang Super Typhoon NANDO nga nakagwa na sa PAR kag may International Name nga Super Typhoon RAGASA, samtang ginahusoy sini ang kadagatan sa nabagatnan sang China.
Ang sentro sang Bagyo ang ulihi nga nasiplatan sa 775 km sa nakatungdan sang Itbayat, Batanes.
Dala sini ang kabaskugon sang hangin nga nagadangat sa 185 km/h kag pagmadlos nga tubtob 230 km/h, samtang ini ang nagahulag padulong sa West Northwestward nga dereksyon.
