Napauli na sa India ang mga bangkay sang 45 ka mamumugon nga Indian nationals nga napatay sa nasunog nga residential building sa Mangaf City, Kuwait sang Miyerkules.
Una na nga ginreport sang Kuwaiti authoritie nga yara sa 50 ka mga tawo ang napatay sa sunog nga ginalakipan sang 45 nagikan sa India, tatlo nagikan sa Pilipinas samtang duha pa ang wala makilal-an.
Suno kay Indian Minister Kirti Vardhan Singh nga personal nga nagpadulong sa Kuwait matapos ang insidente, nagpatigayon na sang DNA tests agud nga matumod ang identity sang mga biktima.
Kalakip sa mga mamumugon nga Indian national nga nakumpirmar nga napatay amo ang 23 nga nagikan sa Kerala state, pito nagikan sa Tamil Nadu, tag tatlo nagikan sa Andhra Pradesh kag Uttar Pradesh, duha nagikan sa Odisha kag tag-isa nagikan sa Bihar, Punjab, Karnataka, Maharashtra, West Bengal, Jharkhand kag Haryana.
Suno sa Indian Minister, nag-arrange ang Indian government sang isa ka special Air Force flight agud nga mapauli ang mga bangkay sang mga napatay nga mga Indian nationals.Naglanding ini sa Kochi city sang Kerala sang Biyernes sang aga kag gindala sa Delhi.
Dinosena naman nga mga mamumugon nga kalabanan ang Indian national ang nasamaran sa sunog.
Samtang, gin-anunsyar naman sang state kag federal governments nga magahatag sila sang compensation sa
na-ilo nga mga pamilya sang mga napatay sa sunog.
