Nagdeklarar sang state of calamity ang banwa sang San Enrique, Negros Occidental bangud sa epekto sang El Niño kag tuman kainit nga panahon.
Sa interview sang Bombo Radyo Bacolod kay Mayor Jilson Tubillara, kaina paagi sa rekomendasyon sang Disaster Risk Reduction Management Office sang banwa sang San Enrique, gindeklarar ang state of calamity.
Suno kay Tubillara, ang resolusyon ang iga-concur na lamang sang Sangguniang Bayan sang San Enrique.
Suno sa alkalde, gindeklarar ang state of calamity bangud ang mga humayan, mga bubon, kag mga fish ponds sa banwa ang nagkalahubas na bangud sa tuman ka init nga panahon.
Ginpahayag man sini nga apektado man ang mga tanum nga tubo sa banwa.
Suno kay Tubillara, pati ang mga health care workers ang masako man sa karun bangud sa mga nagabalatyag bangud sa tuman kainit nga panahon.
Suno sa alkalde, nagahatag ang banwa sang bugas sa mga apektado sang El Niño bangud ang mga seeds nga ginpanagtag ang indi pa mahimo matanom bangud sa sitwasyon sa karun.
May yara man sang livelihood nga gindihon ang banwa bilang bulig man sa mga residente.
Ginalantaw man sini nga ang quick response fund ang indi makaigo sa mga apektado gani ginalantaw sini nga nga kinahanglan pa nila ang supplemental budget.
Ginpahayag man sini nga magluwas sa EL Niño, ang banwa ang nagapangita man sang mabaklan sang idik para ipanagtag sa mga residente nga apektado sang ASF.
Nagapanawagan ini sa national government sang bulig para sa cloud seeding agud nga bisan paano mabuligan man ang mga mangunguma kasubong man sang bulig nagikan sa national government bangud sa epekto sang El Niño sa banwa .
