Gin-atake sang Iran ang isa ka Kuwaiti tanker nga kargado sang langis samtang yara sa kadagatan sang Dubai.
Naigo ang tanker sang drone attack sang Iran apang suno sa mga otoridad, wala sang may nag-leak nga langis ukon nareport nga nasamaran matapos ang nasambit nga pag-atake.
Antes ang pag-atake, nauna na nga nagpaandam ang Kuwait Petroleum Corporation sang posible nga oil spill matapos gin-atake sang Iranian forces ang dako nga carrier sang krudo nga “Al-Salmi” samtang nagadungka sa Dubai.
Naigo ang nasambit nga vessel sa distansya nga 31 nautical miles sa aminhan-nakatundan nga bahin sang Dubai, suno sa UK’s maritime authority (UKMTO).
Nagresulta naman sang sunog ang drone attack, nga gilayon man napalong sang mga otoridad sa Dubai.
Gindeklarar nga ‘contained” sang mga otoridad ang nasambit nga insidente.
Ang bag-o nga pag-atake sang Iran ang kasunod sang liwat nga pagpaandam ni U.S. President Donald Trump nga bombahan sini ang energy sources sang Iran kun indi liwat magabukas ang Strait of Hormuz.
