Gin-aprubahan na sa second reading sa Kamara ang Bayanihan to Arise As One bill ukon Bayanihan 3 stimulus package, nga may tinutuyo nga magprovide sang P401 billion nga balor sang interventions agud magbulig sa mga Filipino sa tunga sang COVID-19 pandemic.
Ang substitute bill ang nagabalor sang kapin P401 billion kag mas manubo sa P405.6 billion nga gintalana sa original version sang hagna.
Sa idalum sang hagna, ang financial aid nga nagabalor P2,000 ang igahatag sa tanan nga mga Filipino apisar sang ila economic status paagi sa duha ka tranches.
Pila ka mga mamalidha, ilabi na ang mga nagikan sa Makabayan bloc, ang nagpanghangkat nga pataason ang assistance sa P10,000 kada pamilya.
Apang ang Bayanihan 3 ang nagpangatubang man sang mga issues matapos ini gin-aprubahan sa House committee on appropriations apisar nga wala sang certification sang available funds nagikan sa Bureau of Treasury.
Sang Marso 25 sang tinalikdan nga tuig, ginpermahan ni Presidente Rodrigo Duterte ang Republic Act 11469 ukon ang Bayanihan to Heal as One Act (Bayanihan 1) nga nagahatag diri sang dugang nga gahom agud ma-address ang COVID-19 pandemic.
Kabug-usan nga P387.17 billion ang ginrelease sa nagkalain-lain nga ahensya sa idalum sang layi.
Ang Bayanihan to Recover As One Act (Bayanihan 2) ang ginhatagan sang appropriation nga P140 billion.
Ang validity sang pondo ang gin-extend tubtob Hunyo 30 sini nga tuig agud mapahanugutan ang mga ahensya agud maroll-out ang ila programa.
