Nagpasalig ang city director sang Bacolod City Police Office nga ipatuman nila sang husto ang curfew sa ciudad.
Sa idalom sang Executive Order No. 22 Series of 2020 nga ginpagwa ni Mayor Evelio Leonardia kahapon, ang curfew hours ang magasugod alas-10:00 sa gabi-i kag magatakop alas-4:00 sang kaagahon pagkasunod nga adlaw.
Suno kay Police Col. Henry Biñas, alas-9:00 pa lang sang gab-i magasugod na sa pag-roving ang mga patrol cars sang kada police station sa Bacolod.
Nagahingyo man ini sa mga barangay officials nga magbulig man sa pag-patrolya agud nga mabantayan ang kada sitio.
Dugang pa ni Biñas nga nagapatigayon man sila sang rekorida agud nga mapalapta ang impormasyon nahanungod sa curfew.
Ginamanduan sini ang mga ginikanan nga mangin responsable sa ila mga kabataan nga indi sila maglapas sa curfew.
Ang sin-o man nga maglapas sa curfew suno sa EO ang dakpon sang PNP.
Exempted lamang sa curfew ang medical personnel kag mga persona nga nagakinahanglan sang emergency medical help; night shift workers sa mga pharmacy kag drugstores; security guards; BPO workers; public utility emergency personnel; firefighters kag iban nga disaster relief personnel; mga pari kag ministro nga nagaperform sang last sacraments ukon last rites; kag public utility vehicle drivers nga nagaserbisyo sa una.
Kadungan sini, gina-engganyo ang mga residente sang Bacolod nga magpabilin sa sulod sang balay kun indi man lang magreport sa trabaho, magbakal sang kinahanglanon ukon magbakal sang bulong.
Ginaapela man sini ang pag-obserbar sang social distancing.
Ang mga malls, recreational centers kag community centers ang ginamanduan man nga magsirado na alas-8:00 sa gab-i, magluwas lamang sa business process outsoursing, medical centers, hospitals, iban pa nga health care establishment, pharmarcies kag funeral parlors.
