Natapos na ang bicameral conference committee meeting para sa final nga bersyon sang 2026 national budget.
Pasado alas-2:20 kaina sang kaagahon, Disyembre 18, 2025 natapos sang Senado kag House of Representatives ang diskusyon sa pila ka mga amendment sang 2026 General Appropriations Bill.
Nahibaluan nga naglab-ot sa anum ka adlaw ang bicameral conference nga nagsugod halin sang Disyembre 13 tubtob Disyembre 18.
Ginpangunahan nanday Senate Finance Committee Chairperson Sherwin Gatchalian kag House Appropriations Chair Mikaela Suansing ang bicameral meeting.
Makabig nga maragtas ang subong nga tuig bangud sa masami ginahimo ang bicameral conference sa budget nga closed-door apang sa una nga kahigayon ini ang gin-livestream agud mangin transparent sa publiko.
Ang P6.793 trillion nga 2026 General Appropriations Bill ang isumiter kay Pangulo Ferdinand Marcos Jr. agud ma-aprubahan.
