Nagpahanumdom si Vice Mayor El Cid Familiaran sa publiko nga likawan ang pag-post kag pag-share sang fake news sa social media.
Ini ang kasunod sang nagalapta nga post nga may yara sang isa ka Chinese national nagikan sa Wuhan City, China nga naga-tinir sa isa ka hotel sa Bacolod.
Suno kay Familiaran, ang pagpalapta sang fake news ang indi lahog-lahog nga krimen.
Sa idalom sang Republic Act 11332 ukon “Mandatory Reporting of Notifiable Diseases and Health Events of Public Health Concern Act”, may yara sang penalidad nga 20 tubtob 50 mil pesos ang maga-bayolar sa nasambit nga layi.
Suno sa bise alkalde, maga-pasar sila sang resolusyon agud pa-imbestigaran sa National Bureau of Investigation (NBI), Criminal Investigation and Detection Group (CIDG) kag sa kapulisan ang mga nagahimo sang fake news.
Ginkumpirmar man ni Familiaran nga sa karon may yara na sila sang lead tuhoy sa identity sang persona nga nagpalapta sang fake news nahanungod sa Chinese national nagikan sa Wuhan City nga yari sa ciudad.
