Bluefin tuna, nakuha sang isa ka Japanese restaurant paagi sa bidding sa balor nga P182.2 million

Nagdangat sa $3.24 million ukon P182.2 million ang balor sang gin-bid sang kilala nga Japanese sushi restaurant agud mabakal ang isa ka bluefin tuna.

Ini na ang pinakamahal nga bili sang isa ka isda nga na-record sa tuigan nga New Year auction sa Toyosu fish market sa Tokyo.

Ang tuna nga nagabug-at sang 243 kilograms ang nabakal sang Kiyomura Corp, ang Tokyo-based operator sang sikat nga sushi restaurant chain nga Sushizanmai.

Pagkatapos sang bidding, gindala ang dako nga isda sa head branch sang Sushizanmai, ginkihad-kihad kag ginpanagtag sa ila restaurants sa bug-os nga pungsod.

Pasalig sang ginhingadlan nga ‘Tuna King’ nga si Kimura nga sa pihak sang kamahalon sini, ibaligya sa kinaandan nga presyo sa mga customers ang tuna dishes.