Negatibo ang gina-alegar nga bomb threat sa Doña Montserrat Lopez Memorial High School suno sa Chief of Police sang Silay City Police Station.
Sa interview sang Bombo Radyo Bacolod kay Police Lt Col. Mark Anthony Darroca, ginpadulungan nila ang eskwelahan sang nakabaton sila sang tawag nagikan sa duty guard sang nasambit nga eskwelahan.
Suno kay Darroca, ang nagreport nga gwardiya ang nakabaton sang tawag halin sa isa ka babayi nga nagpahayag nga may yara ini sang ginbilin nga bomba sa guard house.
Gilayon nga ginpadulungan sang mga kapulisan sang Silay City Police Station ang eskwelahan agud nga magpatigayon sang imbestigasyon apang wala man sang nakita nga bomba ang mga kapulisan.
Apang suno kay Darroca luyag sang school principal nga ma-clear ang bilog nga eskwelahan gani nagtawag sila sang Explosive Ordnance Division (EOD) personnel.
Nagcoordinate naman ang kapulisan sang Silay City Police Station sa PLDT agud ma-trace ang contact number sang nagtawag kag kun mahibaluan kun sin-o ini kag pasakaan sang nagakaigo nga kaso.
Nagpanugyan ang hepe sa mga pumuluyo nga kun sin-o man ang may yara sang nakabaton sang prank call nga bomb threat dapat magtawag gilayon sa mga kapulisan agud nga gilayon nga marespondehan.
