BACOLOD CITY — Ginkilala sa ginhiwat nga Regional Sandugo Awards sa Western Visayas ang kontribusyon sang Bombo Radyo Bacolod bangud sa kadamuon sang dugo nga natipon sa ginpatigayon nga Dugong Bombo 2016.
Sa awarding ceremony nga ginhiwat sa Jaro, Iloilo kahapon nga adlaw, liwat nga ginpasidunggan sang Philippine Red Cross ang DYWB Bombo Radyo Bacolod upod sa tatlo ka iban pa nga non-government organizations (NGOs) nga may pinakamadamo nga dugo nga natipon sa mga bloodletting activities.
Suno kay Rita Benita Mirasol, officer-in-charge (OIC) administrator sang Philippine Red Cross Bacolod-Negros Occidental chapter, ginkilala man ang Bombo Radyo bilang may pinakamataas nga natipon nga dugo sa sulod lamang sang isa ka adlaw nga bloodletting activity kun ikumparar sa iban nga NGOs nga makapila ka beses nagpatigayon nga blood donation activity sa sulod sang isa ka tuig.
Nahibaluan nga magluwas sa NGOs, may mga local government units man nga ginpasidunggan sa Regional Sandugo Awards nga ginalakipan sang city government sang Himamaylan, municipal government sang EB Magalona kag siyam ka mga barangay sa ciudad sang Bacolod.
Ang mga awardees ang nakatipon sang dugo nga masobra sa one percent sang bug-os sini nga populasyon.
