Ginpangunahan ni Jrue Holiday kag Jayson Tatum ang kadalag-an sang Boston Celtics batok sa Dallas Mavericks sa score nga 105-98 sa Game 2 sang National Basketball Association (NBA) Finals kaina sang aga.
Si Holiday ang nagbubo sang 26 ka puntos samtang nakahimo naman sang triple-double si Tatum.
11 ang napasulod ni Holiday gikan sa 14 sini ka field shots nga nagresulta sang 2-0 lead sa best-of-seven series.
Si Tatum ang nagtapos naman sa 18 ka puntos, siyam ka rebounds kag 12 ka assists; samtang nagcontribute man sang 21 ka puntos si Jaylen Brown, 18 kay Derrick White, kag 12 kay Kristaps Porzingis.
Sa pihak nga bahin sa Dallas, si Luka Doncic ang may pinakamataas nga puntos sa triple-double nga 32 points, kag tig-11 nga assists kag rebounds.
Ginasundan sang 17 ka puntos ni PJ Washington, 16 kay Kyrie Irving kag 13 kay Derrick Jones Jr.
Ang Game 3 ang natalana sa Huwebes sa Dallas, Texas.
Sa interview sang Bombo Radyo Bacolod kay Basketball Coach Leo Ceralbo, pito ka players sang Boston ang nagapuntos batok sa duha lamang ka players nga nagdala sa Dallas.
Dugang pa sini nga madamo sang mga crucial play ang Dallas kag ang mga palso sang mga ini ang nagakaconvert sang Boston sa puntos.
Dugang pa sini nga mabaskog ang teamwork sang Boston kag sila ang solido sa depensa.
Samtang ang sentro sang Dallas ang kulang naman sa eksperyensya kag kaangay nga nagaduhaduha pa sa pagpuntos gani sa masami ginapasa sini sa gwa ang bola.
Nagapati si Ceralbo nga hinali nga madugangan sang bisan isa lamang ka daog ang Boston, dako ang tyansa nga tubtob lamang sa Game 5 ukon 6 ang hampang.
