Nagapati ang secretary general sang National Citizens’ Movement for Free Elections (NAMFREL) nga lunsay dehado ang mga kandidato kag mga pumuluyo pananglitan nga madayon ang ban sa face-to-face campaign para sa 2022 elections.
Kasunod ini sang ginpahayag ni Commission on Elections (Comelec) spokesperson James Jimenez nga posible idumili ang face-to-face nga pagpangampanya para sa May 2022 elections bangud sa COVID-19 pandemic.
Sa interview sang Bombo Radyo Bacolod kay Eric Jude Alvia, ginpahayag sini nga pareho nga dehado ang mga kandidato kag pumuluyo pananglitan nga wala sang matabo nga face-to-face campaign activities.
Suno sa iya, disbentaha ini sa mga kandidato nga wala sang kwarta kag resources para makakampanya paagi sa online.
Dugang pa sini nga makaluluoy man ang mga botante nga wala sang access sa internet.
Suno kay Alvia, posible nga makapatigayon sa gihapon sang face-to-face campaign sa mga lugar nga may manubo nga kaso sang COVID-19 kag mahalog-halog nga quarantine status.
Dugang pa sini nga posible makasugod naman ang vaccination program antes pa man ang pagpangampanya, gani nga pwede makapatigayon sang face-to-face campaign sa mga lugar nga nabakunahan na ang mga pumuluyo.
