Aminado ang pinuno sang Bacolod Traffic Management Unit nga nangin magutok ang trapiko sa pila ka bahin sang ciudad sa pagpatigayon sang Grand Salubong sa Bacolod Masskara Festival 2024, apang nangin epektibo man ang ila nga traffic plan.
Sa interview sang Bombo Radyo Bacolod kay Police Major Ramil Sarona, alas-4:00 sang hapon tubtob alas-6:00 sang gab-i naggutok ang trapiko partikular na sa palibot sang Bacolod Public Plaza kag padulong sa Bacolod City Government Center bangod sa ginpatigayon nga Grand Salubong Caravan.
Ginapakamaayo sini nga apisar sa paggutok sang trapiko, wala sang nagluntad nga kinagamo sa dalanon.
Suno kay Sarona, normal lamang nga may-ara sang magreklamo bangod naka-eksperyensya sang kabudlayan sa traffic.
Aminado ini nga nangin magutok ang trapiko bangod madamo sang nagpartisipar sa motorcade kag bangod madamo sang dalan nga ginlabayan.
Suno kay Sarona, antes paman ang aktibidad, ila man nga ginpalapta sa social media kag gin-anunsyar sa mga radyo ang natuhoy sa patigayunon nga mga road closures bangod sa Grand Salubong Caravan.
Paathag sini nga may deployment naman sang mga personnel sa tanan nga festival sites santo sa schedule sang mga aktibidad agud ma-assists ang mga motorista.
