Kanselado ang byahe sang manubo sa 250 gross tons nga mga barko sa BredCo Port sa ciudad sang Bacolod bangud sang gale warning tuga sang Bagyo Falcon.
Suno kay Lt. Senior Grade Rockliff Buling, commander sang Coast Guard Station Bacolod, epektibo ang kanselasyon tubtob indi mabatak ang gale warning.
Sa BredCo Port, isa lang ka fast craft ang manubo sa 250 gross tons ang kabug-aton kag ini ang magamay nga Ocean Jet.
Indi apektado sang kanselasyon ang Weesam, Super Cat kag roll-on-roll-off (RORO) vessels.
Samtang kahapon, naglibot ang Philippine Coast Guard sa coastal areas sang ciudad lakip na sa kaingod nga banwa kag ciudad kag gindumilian ang magagmay nga mga sakayang panagat nga magpangisda.
Ginmando man ni Buling ang pagpauntat sang byahe sang mga bangka sa Pulupandan padulong sa isla sang Guimaras.
Ginkumpirmar sang CGS Bacolod commander nga wala sang mga pasahero nga na-stranded sa pwerto sa ciudad kahapon.
