BACOLOD CITY — Gindula sang Cauayan Municipal Police Station ang kahangawa sang mga pumuluyo sa banwa kasunod sang impormasyon nga may armado nga mga lalaki nga nagdungka sa Barangay Inayawan, Biyernes Santo sang gab-i.
Sa interview sang Bombo Radyo kay Police Chief Inspector Ruben Pajarito, indi matabo sa Cauayan ang kaangay sang natabo sa Bohol sang nagligad nga semana.
Sa ila nga imbestigasyon, napamatud-an nga naaberya ang pumpboat sang American national nga si Frank Vlasquez sang Bacong, Negros Oriental amo gani nga nastranded ini.
Sang nabaton sang Cauayan PNP ang impormasyon halin sa mga pumuluyo, nakig-angot sila sa Philippine Army agud nga makaresponde kag mavalidate ang balita.
Apang sang Biyernes sang gab-i, wala sila nagdiretso sa lugar matapos nagpahayag ang nainterview nga driver sang mga salakyan pakadto sa Bacolod nga may mga bato nga ginbutang sa tunga sang dalan sa Barangay Linaon.
Wala ginbalewala sang otoridad ang amo nga patimaan kag ginhulat nila nga mag-aga antes nagkadto sa Inayawan agud mag-imbestigar.
