BACOLOD CITY — Kontento ang Philippine Charity Sweepstakes Office (PCSO) sa kampanya sang Bacolod City Police Office (BCPO) batok sa ilegal gambling.
Ini ang ginpahayag ni PCSO Chairman Jose Jorge Corpuz sa pag-atubangay nila ni BCPO Director Police Senior Supt. Jack Wanky kahapon.
Sa interview sang Bombo Radyo, ginkumpirmar ni Wanky nga may yara sila sang impormal nga istoryahanay ni Corpuz sang magkari ang opisyal sang PCSO sa probinsiya kahapon.
Suno kay Wanky, ginpabutyag ni Corpuz ang pagka-kontento sini sa ginhimo nga presentasyon sang BCPO sa ila kampanya kontra ilegal nga pataya sa ciudad sang Bacolod.
Samtang, isa man sa ila nahambalan ang pag-operate sang Peryahan ng Bayan, nga ginpasuni liwat maga-operate sa ciudad sang Bacolod.
Suno kay Wanky, mismo kay Corpuz naghalin nga ilegal nasambit nga numbers game.
Kadungan sini, ginmanduan man sang PCSO chairman ang BCPO director nga padayunon ang ila mga operasyon kontra sa illegal gambling.
Ginmanduan man ni Wanky ang tanan nga police station commanders sa ciudad sang Bacolod nga tutukan ang liwat pag-operate sang Peryahan ng Bayan.
Suno kay Wanky, matapos ang ila pag-istoryahanay ni Philippine Charity Sweepstakes Office (PCSO) Jose Jorge Chairman Corpuz, nagpapanaog ini sang memorandum nga nagamandu sa kapulisan nga magbantay kun nagsugod na ang operasyon sang nasambit nga illegal numbers game.
Suno kay Wanky, ang madakpan nga koridor sang Peryahan ng Bayan ang ila pagadakpon bangud ini ang ilegal.
