Ginpaidalum sa state of calamity ang ciudad sang Kabankalan nga amo ang nagapangaduha sa probinsya sa may pinakamadako nga balor sang halit tuga sang El Niño.
Sang Abril 17, nagdangat na sa masobra sa P180 million ang balor sang halit sa agrikultura sa probinsya sang Negros Occidental bangod sa tuman ka init nga tiyempo.
Sa interview sang Bombo Radyo kay Vice Mayor Miguel Zayco, apektado sang El Niño ang 13 tanan ka mga barangay, 1,214 ka mga mangunguma kag 579.37 hectares sang duta.
Suno diri, sa bahin sang humay, mais, kag utanon 41 percent na sang area ang nadamaged, kag sa tubo naman nagdangat na sa kapin sa 80 percent ang apektado.
Bangod, sini nadesisyon ang ciudad nga ipaidalum sa state of calamity ang Kabankalan agud maggamit ang calamity fund para sa mga programa kag tikang nga makabulig sa ciudad.
