Nagdangat sa 32 ka mga classroom ang reported nga nahalitan sa epekto sang Severe Tropical Storm Kristine sa Western Visayas.
Sa interview sang Bombo Radyo Bacolod kay Hernani Escullar Jr., public information officer sang Department of Education Region 6, may nareport nga 32 ka mga nahalitan nga classrooms kun sa diin anom diri ang totally damaged kag duha ang may major damage.
Apang paathag sini nga ila pa nga iverify ang mga report, agud matumod ang matuod nga numero kag kun sa diin nga mga buluthuan ang may nahalitan nga pasilidad.
Paathag ni Escullar nga madamo ang mga nagsuspend sang face-to-face classes agud maseguro ang safety sang kabataan.
Suno diri, indi lamang pagbaha ang malain nga epekto sang bagyo bangod mas madamo nga mga hazzard ang mahimo magluntad sa mga eskwelahan nga nahamtang sa mga nabukid nga lugar.
Kalakip sa ila ginakahangaw-an ang risgo sa pagluntad sang landslide.
Dugang pa ni Escullar nga ang DepEd ang nagasunod sa mga announcement sang local government unit sa suspension sang in-person classes bangod ang mga ini ang may nagakaigo nga equipments sa pagtumod sang weather situations.
Apisar nga wala sang Storm Signal kag wala sang pronouncement ang local chief executives, ang mga school heads ang may diber man nga makapatuman sang suspension sang face-to-face classes kag magshift sa alternative delivery mode kun tuman ka baskog ang pagbubo sang ulan.
Pasalig ni Escullar nga ginaseguro sang DepEd nga mapadayun ang paghatag sang quality basic education apisar sa kaangay nga mga kalamidad.
