Ginpahanumdom sang civil military officer sang 79th Infantry Battalion sang Philippine Army sa mga nag-evacuate bangod sa engkwentro sa Brgy. Salamanca, Toboso, Negros Occidental, nga indi anay magbalik tubtob wala pa matapos ang clearing kag retrieval operations.
Madumduman nga 19 ang ginapahayag nga napatay sa kampo sang NPA, kalakip na si Roger Fabillar ukon Arnel Tapang, alyas Jhong/Nono/Domeng, ang commanding officer sang Northern Negros Front sang New People’s Army nga may P1 million nga patong sa ulo.
May isa naman ka suldado nga napilasan sa engkwentro matapos maigo sang bala sa nawala nga butkon.
Ini ang gilayon man nga nahatagan sang first aid kag estable na ang kondisyon sa ospital.
Magapadayun pa ang ila nga retrieval operation subong nga adlaw, samtang padayun man ang clearing operations.
May tatlo ka eskwelahan naman nga gingamit nga evacuation centers sang masobra 600 ka pumuluyo nga nagbakwit.
Suno kay Fajardo, dyutay lamang ang mga balay sa Brgy Salamanca, gani mas madamo pa ang evacuees gikan sa katupad nga Brgy San Jose.
Pahanumdom sini nga makabalik naman ang pumuluyo kun mabatak na ang red alert status matapos ang clearing kag retrieval operations.
