Naga-apelar gid sang kooperasyon ang ciudad sa mga vendors sa mga merkado sang Bacolod tuhoy sa mando sang Department of the Interior and Local Government (DILG) kag ni Presidente Rodrigo Duterte nga hawanan ang palibot kag subong man ang public roads.
Sa karun ginatinguhaan sang Market Committee Coordinating Task Force sa pagpamuno ni Executive Assistant Ernie Pineda nga masaylo na sa Annex Building sang Libertad Market ang 245 ka mga vendors partikular na ang nagaplastar sa Amelia kag sa Mercedes Streets.
Ini matapos nga nahitso na ang Daniel Ramos St. sa Burgos Market kag nasaylo naman ang mga nagabaligya sang isda sa Ballesteros St. sa sulod sang Central Market.
Ginaplano man nga lantawon ni Pineda ang mga lokal nga ordinansa sang ciudad may angut sa isyu sang paghimo naman nga terminal sang mga traysikol drayber sang Brgy. 40 sang atubang sang Annex Building sang Libertad Market.
Suno diri, importante nga wala nagasaligmato ang mando sang DILG sa local ordinances ilabi na sa ginatukod nga mga terminals sa tagsa ka lugar.
