Ginkakibot sang mga tenants sa Manokan Country sang hinali nga ginbutangan sang yellow line kag nagserbe sang closure order ang Bacolod City Legal Office.
Kaina sang aga, nagsalig na ang mga vendors lakip na si Atty Jomax Ortiz, legal counsel sang Manokan Country tenants nga indi madayun ang closure matapos nga ginpahayag nga magapatigayon pa sang paghinun-anon sa mga city officials.
Ginpalamalos man sang mga vendors ang mga nakahalay nga mga tarpaulins sa gwa sang Manokan Country, matapos magpatunga ang Social Action Center sang Diocese of Bacolod.
Apang matapos nga gindayun ang closure order, amat-amat man nga ginbalik sang mga vendors ang ila mga tarpaulins kun sa diin nakapagkit ang ila nga pagprotesta.
Sa interview sang Bombo Radyo Bacolod kay Fr. Julius Espinosa, Social Action Center head sang Diocese of Bacolod, bilang pastoral obligation sila ang nakigbahin a negosasyon ilabi na nga makabig kaingod sang San Sebastian Cathedral ang Manokan Country.
Pahanumdom sini nga ang public officials ang gin-elihir agud ulikdan ang kaayuhan sang tanan, apang wala man lang gin-ulikdan ang mga vendors kag mga empleyado nga maapektuhan.
Suno diri, indi maathag ang posisyon sang lokal nga gobyerno kag ini ang masami nagabag-o bag-o.
Aminado ini nga may mga legal issues, kag ini ang gina-asikaso na sang legal counsel, apang sila sa simbahan ang nagaduso lamang nga mahatagan sang konsiderasyon ang mga concerns sang tenants.
Pangamuyo sini nga may mabinungahon nga resulta ang natalana pa nga diskusyon sa tunga sang duha ka partido.
On standby man ang mga kapulisan gikan sa Bacolod Police Station 1, nga nagabantay inkaso may magluntad nga kinagamo.
