Tuman ang kalipay kag nangin emosyonal ang coach sang mga atleta sang Romanito P. Maravilla Sr. National High School (RMNHS) sa Barangay Estefania, Bacolod City kasunod sang inagurasyon sang athletes dormitory kahapon.
Sa interview sang Bombo Radyo Bacolod kay Coach Miguel Arca, ginakabig niya ini nga natuman nga handom ang pagpatukod sang ciudad sang bag-o nga dormitoryo para sa mga atleta sang ciudad.
Suno kay Arca, dako ang pagpasalamat sini sa grasya nga nabaton bangud may maayo na nga maestaran ang mga atleta.
Suno diri, napulo na katuig ang nakaligad sang nagloan ini agud nga magpatindog sang payag agud nga may istaran ang mga atleta sang nasambit nga buluthuan.
Dako ang pagpasalamat sini sa alkalde sang ciudad nga nakakita sang sitwasyon sang mga atleta kag nagdihon sang tikang agud mapatindugan ang mga ini sang dormitoryo.
Nagapasalamat man ini sa suporta nga ginhatag sang Department of Education ilabi na sa school principal agud nga matukod ang nasambitan nga proyekto.
Samtang, dako man ang kalipay sang tanan nga mga atleta sang nahibaluan sang mga ini sang tinalikdan nga tuig nga patindugan ang mga ini sang dorm kag sa karun nainagurahan na.
Suno kay Mico Villaran, isa sa mga gold medalists, nalipay gid ang mga ini bangud may yara na sila sang insakto nga palahuwayan kag hiligdaan.
Suno kay Villaran, ginapasalamatan sini ang tanan ang ciudad sa pagpanguna ni Bacolod City Mayor Alfredo “Albee” Benitez kag ang eskwelahan nga naghimo sang tikang agud nga matukod ang dormitoryo.
Halin sang day 1 nga nangin atleta ini sa payag nga ginpahimo ni Coach Miguel Arca nagaistar.
Ginapaigo lamang nila nga pulo ang ila kaugalingon sa isa ka payag.
Dako man ang kalipay ni Villaran bangud ang magasunod sa ila nga mga atleta ang maayo na ang pasilidad nga ila matiniran.
