Ginpahayag sang presidente sang Bacolod Alliance of Commuters, Operators, and Drivers (BACOD-Manibela) nga may yara pa sang second batch sa paghatag sang fuel subsidy apang wala pa nahibaloan kun san-o ini matabo.
Sa interview sang Bombo Radyo kay Rudy Catedral, may yara sa gihapon sang wala nakabaton sang fuel subsidy kag sang Mayo 18 nagpadulong ini sa Land Transportation Franchising and Regulatory Board (LTFRB) Region 6 kag nakighinon-anon kay Regional Director Richard Osmeña.
Suno diri, iya ginpamangkot kun ano ang matabo sa mga wala nakabaton sang ayuda kag ginpasaligan man ini nga basta nakapasa sang application ang driver ukon operator mahimo pa ini nga makakuha sang ayuda sa second batch sang pay-out.
Suno kay Catedral ginpahibalo man sini si Osmeña nga iban wala nakakuha bangod ang ila drivers license naka-address sa malayo nga lugar kag didto sila ginapakuha sang ayuda.
Iban nagtinguha nga magbyahe para lang makakuha sang subsidiya apang pag-abot didto natapos na ang pay out.
Pahayag ni Catedral, may ginpasalig nga may second batch sang pay out apang wala pa nahibaloan kun ano ang ihatag nga schedule sang Department of Social Welfare and Development (DSWD).Samtang, ginklaro sang Regional Director sang Department of Social Welfare and Development – Negros Island Region (DSWD-NIR) nga natapos na ang payout sang P5,000 fuel assistance sa mga tricycle drivers.
Ini kasunod sang pagreklamo sang pila ka mga tricycle drivers sa Ipa-Bombo Ta segment matapos nga wala makakuha sang financial assistance apisar sa makapila nga pagschedule sang special payout.
Pahayag sang mga ini nga sila ang wala napahibalo sang schedule.
Sa interview sang Bombo Radyo Bacolod kay DSWD NIR Director Arwin Razo, nagclose na ang ila pagbatun sang request kag endorsement para sa mga Tricycle Operators and Drivers’ Association (TODA).
May-ara pa sang pipila nga mga tricycle drivers nga ginalab-ot pa nga mahatagan apang ini ang limitado na lamang.
Panugyan ni Razo sa mga nagreklamo nga tsekyaron gid anay kun sila ang matuod nga yara sa listahan.
Duha sa ginalantaw sini nga rasun kun ngaa wala naka-claim ang bangod wala nakapakita apisar sa ginhatag nga ‘deadliest deadline,’ ukon mahimo nga kulang ang ila mga information nga ginhatag gani wala ma-qualify nga makabatun sang ayuda.
