Tuman ang kalipay sang coach sang mga atleta sang Romanito Maravilla National High School sa Brgy Estefania, Bacolod City sa ginhatag nga suporta sa ila para sa bag-o nga athletes’ dormitory.
Sa interview sang Bombo Radyo kay Coach Miguel Arca, sang nagdaog sang gold medal si Mico Villaran sa Palarong Pambansa 2024, nagcourtesy call ang atleta kay Bacolod City Mayor Alfredo ‘Albee’ Benitez kag iya ginpakita ang lugar nga ginatiniran sang mga gold medalist.
Gilayon naman nga nagmando ang alkalde nga ikumpirmar ang land title para nga mapatukoran sang dormitory ang mga athletes.
Ang dormitory ang may disensyo nga split level, ang upper level amo ang kwarto sang athletes, 16 beds para sa mga lalaki kag 16 beds man para sa mga babayi, kag kada kwarto ang may yara sang banyo.
Samtang, ang lower level naman amo ang para sa coach office kag dining area.
Suno kay Arca, samtang ginatukod ang dormitory may yara sila sang temporaryo nga barracks nga ginatiniran sang athletes.
Sa karun, padayon man ang ila training para naman sa preparasyon sa Batang Pinoy nga patigayunon sa Puerto Princesa, Palawan.
Suno diri, madamo sang naghatag sang suporta sa ila lakip na ang mga athletes sadto sang nasambit nga buluthuan nga sa karun iban ang yara na sa luwas sang pungsod samtang ang iban naman ang nagapadayon sang ila sports career.
Pahayag ni Arca, ginapa-intindi gid sini sa mga athletes ang ila goal kag purpose sa pagpadayon sang ensayo agud sa ulihi mangin inspirasyon sa magasunod sa ila.
