BACOLOD CITY — Isa ka executive order ang ipagwa sang alkalde sang banwa sang Hinigaran sa masunod nga semana agud nga idumili ang pagbaligya sang Coca-Cola products sa ila kapiestahan sa Abril 20 tubtub 30.
Sa interview sang Bombo Radyo, ginpahayag ni Mayor Jose Nadie Arceo nga sakop sang amo nga EO ang tanan nga kiosko nga magabaligya sa public plaza sang banwa apang wala na diri nalakip ang mga restaurant kag iban pa nga balaligyaan sa iban nga parte sang Hinigaran.
Ini ang kabahin suno sa alkalde sang pagpakita sang protesta sang banwa sa paggamit sang Coca-Cola FEMSA Philippines sang high fructose corn syrup sa baylo nga lokal nga kalamay bangud wala sila nagabulig sa ekonomiya sang Negros Occidental.
Sa masunod nga semana, sapulon sang alkalde ang tanan nga mga tag-iya sang kiosko nga magabaligya sa public plaza agud nga ila mahibaluan ang amo nga pagsulundan nga iga-concur naman sang Sangguniang Bayan.
Gin-athag naman ni Arceo nga wala na nalakip diri ang mga produkto sang Pepsi Cola kundi ang iya lamang sang Coca-Cola.
