Arestado ang 26 anyos nga college undergraduate matapos makuhaan sang masobra P400,000 nga suspected shabu sa Purok Mahigugma-on, Brgy Tangub, Bacolod City.
Ang subject ang ginkilala nga si Cyrill John Tortusa alias Crew, wala sang trabaho kag residente sa nasambitan nga lugar.
Ang operasyon ang ginpangunahan sang PNP Drug Enforcement Group – Special Operation Unit 6 (PDEG SOU 6) alas-11:59 kagab-i.
Sa interview sang Bombo Radyo Bacolod kay Police Lt. Oliver Diesta, team leader sang PDEG SOU 6, nagadangat man sa tatlo ka semana ang ila nga monitoring sa subject bangod suludlon kag makitid ang lugar.
Dugang pa sini nga madamo sang tawo sa area kag ang subject ang madamo sang mata gani nakaangkon sang kabudlayan ang mga operatiba nga ini ang masulod.
Antes ang operasyon, nakabatun pa sila sang impormasyon nga naghalin sa iya balay ang subject agud magkuha sang dugang nga suspected drug items.
Paathag ni Diesta nga newly identified target ang status ni Tortusa sa ila, apang natukiban nga ini ang yara na sa drugs watchlist sang Barangay Tangub sumugod subong nga tuig.
Nakuha diri ang 13 ka sachet sang suspected shabu kalakip na ang buybust item nga may ginabanta bug-at nga 60.5 grams kag may standard drug price nga P411,400.
Suno kay Diesta ila pa nga trabahuon nga masundan kiun sa diin nagakuha sang supply ang suspect kag magapatigayon sang follow up operations.
Si Tortusa ang ginturn-over sa kustodiya sang Bacolod Police Station 8; ang mga non-drug evidence, ang yara naman sa paghinakop sang PDEG SOU 6 samtang ang mga suspected shabu ang ginpadala sa Negros Occidental Provincial Forensic Unit para sa laboratory examination.
