BACOLOD CITY — Ginarespeto ni Bacolod Lone District Congressman Greg Gasataya ang desisyon ni Presidente Rodrigo Duterte nga bungkagon ang Negros Island Region.
Sa interview sa Zona Libre Program, ginpahayag ni Gasataya nga may legal nga balasehan ang ginhimo ni Presidente Duterte nga pag-issue sang Executive Order 38 nga naga-dissolve sang Region 18 kun sa diin isa sa mga ginlantaw amo ang kakulangan sa budget.
Ginpabutyag ni Gasataya nga nagaupod ini sa sentimyento sang mga pumuluyo sang Bacolod kag Negros Occidental sa nangin kapalaran sang NIR apang mas makapamaayo kun tutukan na lamang ang mga maayo nga natabo sa sulod sang kapin duha ka tuig nga pag-eksister sang rehiyon.
Dugang pa sini, indi na kinahanglan ang isa ka layi kun ang tinutuyo sang duha ka probinsiya amo ang magbuligay, mag-angkon sang maayo nga koordinasyon, kag lakip naman ang pagbayluhanay sang “good practices” sa tunga sang mga ini.
Dapat man nga tutukan kun paano mapadayon ang maayo nga serbisyo, lakip na ang paghatag sang mga ahensiya sang gobyerno sang kahapusan sa publiko, nga amo ang mayor nga tinutuyo sang pagtukod sang Negros Island Region.
Nagpamalibad man si Gasataya nga maghatag sang komento angot sa huring-huring nga politika ang sa likod sang pagbungkag sang Negros Island Region.
Ginpahayag ni Gasataya nga ang kaangay nga mga sugilanon ang makapagamo lamang sang sitwasyon kag wala nagasantu sa matuod nga tinutuyo sang pagtukod sang NIR nga amo ang direkta nga pagserbisyo sang mga ahensiya sang gobyerno sa mga pumuluyo.
Samtang, wala naman ginalantaw ni Gasataya ang anggulo sang politika bangud sa pihak nga wala nagdaog si Duterte sa Bacolod, nakabenepisyo ini sa madamo nga mga proyekto sa idalom sang administrasyon.
Nahibaluan nga indi kaangay sang iban nga mamalidha, wala nagsaylo si Gasataya sa PDP-Laban nga partido ni Duterte kag sa baylo, nagpabilin ini sa Nationalist People’s Coalition (NPC).
Apang sa pihak sini, suno kay Gasataya, wala siya nabudlayan sa paghingyo sang mga proyekto kag programa gikan sa national government.
