Tumalagsahon nga makit-an nga ‘Sea Devil’ fish, nagpakita sa mga researchers antes ini ginbawian sang kabuhi.
Ginkakibot sang mga researchers sa Spain nga nagapatigayon sang pagtuon sa mga bagis sang gulpyada lang nagpakita sa ila ang isda nga ginkilala nga ‘Sea Devil’.
Nagpatigayon sang research study ang non-governmental organization (NGO) nga Condrik Tenerife sa Canary Islands, ila nakit-an ang isa ka Melanocetus Johnsonii nga ginatawag nga ‘sea devil’ kag ‘black sea monster’.
Ang ini nga klase sang isda ang masami makit-an sa idalum sang dagat sa 200-2,000 meters nga halos indi na malab-otan sang silak sang adlaw.
Ang mga specimen sang ‘sea devil’ ang masami makit-an sa mga museum.
Suno sa Condrik Tenerife, ini ang makabig nga una nga kahigayunan nga narekord ang pagkakita sa isda nga buhi kag yara sa manabaw nga bahin sang dagat.
Suno sa Marine Biologist nga si Laia Valor, makaligad ang pila lang ka oras ginbawian sang kabuhi ang isda.
Gindala sang research team ang lawas sang isda sa Museum of Nature and Archaeology agud matun-an.
Ang mga babayi nga Melanocetus johnsonii ang kilala sa ila dorsal appendage nga nagasiga para maka-attract sang ila pagkaon samtang ang lalaki naman nga anglerfish ang nagadangat lang sa isa ka pulgada ang kadakoon.
