BACOLOD CITY — Kumpiyansa ang Regional Sports Coordinator sang Department of Education Negros Island Region nga may ibato ang mga Negrense nga katapo sang Negros Occidental, Philippines nga magabatu sa Little League World Series sa Estados Unidos.
Suno kay Adolf Aguilar, madamo sang dalagkuan kag mabaskog nga mga kontra ang mga atleta sang Negros Occidental nga amo ang nagatiglawas sang Asia Pacific Region sa Little League World Series sa mga estado sang Delaware kag Oregon.
Apang sa pihak sini, ang “fighting spirit” kag ang determinasyon sang mga Pinoy amo ang magasustenir sa ila sa bug-os nga torneyo tubtob nga magtapos nga uyat ang kadalag-an.
Suno kay Aguilar, ini ang napamatud-an na sang mga atleta sa Asia Pacific Regional Tournament sa Singapore sang nagligad nga bulan kun sa diin ginlutos sang mga ini ang dalagkuan nga mga kasumpong.
Nahibaluan nga Sabado nga adlaw nagbiya na ang Negrense team padulong sa estado sang Delaware.
Ang World Series ang patigayunon sa Hulyo 31 tubtub Agosto 6 sa Lower Sussex, Delaware kun sa diin 10 ka softball teams gikan sa nagkalain-lain nga rehiyon sa kalibutan ang maga-agaway sa kampeonato.
Samtang, magabiya man sa Agosto 7 ang little league sang Negros Occidental nga tiglawas man sang rehiyon sa Little League Softball World Series nga patigayunon sa Portland, Oregon, USA sa Agosto 9 tubtub 16.
Samtang, napamatud-an ang kaepektibo sang social media matapos nga wala pa mag-24 oras, madamo na ang nagsabat sa panawagan para sa bulig sa mga atleta sang Negros Occidental nga magatiglawas sang Asia Pacific Region sa Little League World Series sa Amerika.
Suno kay Aguilar, nakit-an sini ang gin-agyan sang mga kabataan antes sila nakalab-ot sa World Series rason nga sang mahisayran sini ang ila mga panginahanglanon, partikular sa maleta, kagamitan, pagkaon, pinansiyal kag iban pa, iya ini gin-post sa Facebook.
Suno diri, wala pa maisahan ka adlaw, madamo na ang nagsabat sa iya panawagan bangud natandog sa istorya sang kabudlayan nga gin-agyan sang mga softball players.
Suno kay Aguilar, bangud sang mga bulig nga nabaton sang mga ini, iya nakit-an naga nalipay kag nagtaas ang self esteem sang mga atleta.
Samtang, malipayon man si Aguilar bangud indi lamang mga taga-Negros Occidental ang nagpasalig sang bulig kundi subong man ang mga taga-Oriental.
Suno sa regional sports coordinator, patimaan lamang ini nga nagaisa ang balatyagon sang bug-os nga isla sang Negros sa pagsuporta sa mga players nga magasabak sa World Series.
