BACOLOD CITY – Pilason ang isa (1) ka miyembro sang Philippine Army matapos gin-palukpan sang pito (7) tubtob siyam (9) ka mga gina-patihan miyembro sang New People’s Army ang detachment sini sa Barangay Hilamonan, syudad sang Kabankalan.
Sa exclusive interview sang Bombo Radyo Bacolod kay Col. Benedict Arevalo, commanding officer sang 303rd Infantry Brigade, las-7:45 subong nga gab-i sang natabo ang “typical hit-and-run” nga ginhimo sang mga katapu sang NPA kun sa diin ila gin-paarakan tiro ang detachment sang 62nd Infantry Batallion sa nasambit nga barangay.
Nag-dangat naman sa 15 minutos ang pagbaylohanay sang lupok sa tunga sang tropa sang gobyerno kag sang rebelde nga grupo kun sa diin nag-atras gilayon ang mga NPA pakadto sa syudad sang Himamaylan.
Suno kay Arevalo, posible nga nag-balos ang mga ini sa mga suldado bangud sadtong Enero 1 subong nga tuig sang natultulan kag gin-sulong sang mga otoridad ang ila kampo sa Barangay Buenavista syudad sang Himamaylan.
Bangud diri, nakaangkon sang pilas sa hita si Corporal Andin Jamison matapos ang pag-baylohanay-luthang. Apang yara na sa maayo nga kahimtangan ang nasambit nga suldado. Samtang indi pa sa karun matumod kun may yara sang napilasan sa bahin sang rebelde nga grupo.
May kaangtanan diri, gin-pahayag ni Arevalo nga indi sa tanan nga adlaw kag oras, naga-pangibabaw ang malain nga tinutuyo sang makawala nga grupo, bangud suno sa iya, maabot gid ang tion nga ila pang-uboson ang miyembro sang New People’s Army sa probinsya sang Negros Occidental.
