BACOLOD CITY – Bukas ang Diocese of Bacolod sa pagbaton sang pagpang-agda sang Philippine National Police nga mag-upod ang kaparian sa pagpatigayon sang Oplan Tokhang.
Sa interview sang Bombo Radyo kay Fr. Felix Pasquin, ang rector sang Bacolod San Sebastian Cathedral, pagaupdan sang simbahan ang anuman nga tikang nga magapadulong sa kaayuhan sang katawhan bangud ang kaparian ang nagaserbe nga pastol sang panong ukon shepherd of the flock.
Ginadayaw man ni Pasquin ang inisyatibo sang kapulisan sa paghatag sang alagyan agud makapakigbahin ang simbahan sa kampanya kontra ilegal nga druga.
Apang ginpabutyag sini nga bangud ang Operation Tokhang isa ka aktwal nga operasyon sa diin ang kapulisan nagadala sang armas kag sa tion nga magbatu ang suspetsado, ini ang luthangon, ginduso ni Fr. Pasquin ang paghambalanay sa tunga sang matag-as nga opisyales sang kapulisan kag simbahan sa pagklaro sang pila ka mga parametro sa mangin partisipasyon sang mga pari.
Ini bangud ang simbahan nagapamatok sa anuman nga sahi sang kalakasan ukon pagpatay.
