Gin-athag sang Department of Labor and Employment (DOLE) nga obligasyon sang management ukon employer ang pagproseso sang mga dokumento agud maka-avail ang mga empleyado sang COVID-19 Adjustment Measures Program (CAMP).
Sa interview sang Bombo Radyo kay DOLE Regional Director Cyril Ticao, ginpahayag sini nga ang tanan nga empleyado nga ginpa-untat sa ubra, ginbuhinan ang working hours kag ginbuhinan ang sweldo bangud sa COVID-19 ang maka-avail sang one time P5000 nagikan sa DOLE apang kinahanglan nga ang mga employer ang maproseso sini.
Suno kay Ticao, wala sang dapat nga himuon ang mga empleyado bangud ang mga employers ang kinahanglan nga magsumiter sang report online, status sang empleyado kag payroll para sa bulan sang Pebrero.
Kun macomply na ang tanan nga requirements, suno sa regional director, gilayon nga irelease ang P5000 paagi sa ATM card ukon Padala Centers.
Gindugang man sini nga ang maka-avail lang sang CAMP ang mga empleyado sang private kag public establishments nga napaidalum sa formal sectors. Samtang ginpahayag sang Department of Labor and Employment (DOLE) nga indi kabahin sang COVID-19 Adjustment Measures Program (CAMP) ang mga informal sectors worker apang may yara sila sang lain nga proyekto.
Sa interview sang Bombo Radyo kay DOLE Regional Director Cyril Ticao, ginpahayag sini nga ang mga informal sectors workers kaangay sang vendors, trisikad, jeepney kag tricycle drivers nga apektado sang ginpatuman nga 14 day enhanced community quarantine ang indi kabahin sang CAMP apang may yara man sang nakapain nga proyekto sa ila kag maagi ini sa barangay.
Suno kay Ticao, kinahanglan sang mga ini nga magpalista sa barangay, manglimpyo sang ila ugsaran sa sulod sang apat ka oras sa 10 ka adlaw kag hatagan ang mga ini sang sweldo nga minimum wage ukon P395 per day.
Suno sa regional director, matapos ang 10 ka adlaw, makabaton ang mga ini sang kabug-usan nga P3950.00.
Suno sa iya, ang kapitan ang masumiter sang lista sa DOLE kag sila man ang matsekyar kun nagapaninlo ang mga nasambit nga empleyado.
