Patay ang van driver nga ginluthang sang wala makilal-an nga suspetsado sa Purok San Sebastian, Barangay Sum-AG kagab-i.
Ginkilala ang biktima kay Michael Yema, 45-anyos kag pumuluyo sang Brgy.Vista Alegre, ciudad sang Bacolod
Siya ang nagatrabaho bilang driver sang van halin sa Barangay Sum-AG kag nagadul-ong sang pasahero sa airport.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, ang biktima ang magakadto kuntani sa birthday sang iya abyan.
Suno kay Ofalia, nagpanaog ang biktima sa salakyan kag nagpamangkot sa tag-iya sang boarding house sini sang una kun sa diin ang birthday celebrant.
Sang maglabay ang biktima sa likod sang salakyan wala sang madamo nga estorya ginluthang ang biktima sang wala matumod nga suspetsado nga gilayon man nagpalagyo sakay sa motorsiklo sa wala mahibaluan nga direksyon.
Ginhingagaw dala sa ospital ang biktima, apang wala na natabangan apisar nga ginrevive.
Suno kay Ofalia, mahimo ginsundan sang suspek si Yema antes ini ang gintiro.
Narecover sa crime scene ang fired cartridge sang caliber .45
Nagapadayon sa karun ang imbestigasyon sang Bacolod Police Station 9 sa nasambit nga krimen agud matumod ang motibo kag suspetsado sa krimen.
Samtang… Ginpahayag naman sang amay sang tag-iya sang boarding house nga gintiniran sadto sang biktima nga wala man ini nakahibalo ngaa ginluthang ang biktima.
Suno diri, may nakapanugid lamang sa iya nga may yara sang gintiro matapos nga may nabatian nga isa ka lupok.
Sang gintsekyar niya ini, ang iya abyan ang natiruhan.
Gintawgan man nila gilayon sang kapulisan kag gindala sa ospital ang biktima nga nakaagom sang pila sa ulo.
Suno diri apat ka tuig nga nagtinir ini sa nasambit nga boarding house.
Maayo man ini nga tawo si Michael Yema sa ila bangud close ang mga ini apang wla na ini nakahibalo kun ano ang relasyon sini sa iban nga tawo.
