Patay ang isa ka construction worker matapos nga aksidente makabunggo ang ginamaneho nga motorsiklo sa truck nga may karga nga tubo sa National Highway sakop sang Purok Talotog, Barangay Dulao sa ciudad sang Bago, sang Sabado sang gab-i Abril 12.
Ginkilala ang biktima kay Angelito Servania, 33-anyos, residente sang Purok Margarita Brgy. Abuanan, Bago City kag nagamaneho sang Rusi TC 125CC nga motorsiklo.
Ginkilala naman ang driver sang truck nga si Joven Magbanua, 44-anyos, residente sang Brgy. Tuguis, kag ang helper sini nga si Ronald Ubat, 19-anyos, sang Brgy. Bato sa banwa sang Hinigaran.
Sa interview sang Bombo Radyo Bacolod kay Police Staff Sergeant Ronald Javier, traffic investigator sang Bago City Police Station, nagapondo ang truck bangud gin-islan ang guma kun sa diin samtang naga-ilis ang mga ini may nagapadulong nga motorsiklo kag aksidente nga nakabunggo sa likod sang truck.
Gindala sa ospital si Servania, apang ini ang gindeklarar nga dead on arrival.
Suno kay Javier nagpahamtang sang early warning device si Magbanua apang wala ini nakita ni Servania bangud madulom ang lugar rason nga nagluntad ang aksidente.
May yara naman sang inisyal nga pagestoryahanay ang magtimbang nga bahin.
Nagpanugyan si Javier sa mga motorista nga dapat kondisyon sa tion nga magmaneho kag maghinay sa pagmaneho agud nga malikawan ang aksidente.
