Ginhilway na ang driver sang truck nga nagbunggo sa magtiyo nga nagasakay sa motorsiklo sa Bacolod-Silay Airport Access Road sa Barangay Efigenio-Lizares, Talisay City Sabado sang hapon.
Madumduman nga gina-usoy sang motorsiklo kun sa diin sakay sanday Allan Bedonia, 55-anyos kag Rodrigo Bedonia, 22-anyos nga lunsay mga residente sang Hacienda San Antonio 1, Barangay Dos Hermanas, Talisay City kag truck nga ginamaneho ni Kenneth Virbo kag residente sang Barangay Tinampaan, Cadiz City ang north to south direction sang gindusdos sang prime mover truck ang motorsiklo.
Nagtabog ang magtiyo sa motorsiklo kag naghapla-ag sa dalan.
Bangud sa impact, nawasak ang helmet sang duha kag bangud sa patal nga pilas, lunsay ginbawian sang kabuhi ang mga biktima.
Sa interview sang Bombo Radyo Bacolod kay P/Master Sgt. Michael McDowell, imbestigador sang Talisay City Police Station, ginpahayag sini nga nag-aregluhanay na ang pamilya sang mga biktima kag ang mga tiglawas sang Lopez Sugar Central nga amo ang nagapanag-iya sang truck.
Suno kay McDowell, halin sa ciudad sang Sagay ang truck kag padulong kuntani sa Barangay Ma-ao, Bago City agud nga mag-transload.
Santo sa imbestigasyon, ma-overtake kuntani ini sa isa pa gid ka truck apang na-miscalculate niya ang kalabaon sang iya nga ginadala nga truck kag nalab-ot ang motorsiklo.
Dugang pa sang imbestigador nga may upod si Virbo nga mekaniko apang ginkuhaan lang ini sang detalye kag wala gin-detain.
Suno pa kay McDowell nga luyag lang karon sang pamilya sang mga biktima nga mapalubong sang husto ang mga ini.
