Wala sa gihapon nakit-an ang duha ka lalaki nga gina alegar gin-abduct samtang nagapamunit sa Barangay 35, Bacolod City sang Agosto 2, pasado alas 10 sang gab-i.
Suno kay Police Major Ramel Sarona, station commander sang Bacolod Police Station 1, nagpablotter sang Miyerkules ang pamilya sanday Joneil Villalon, 45-anyos kag Shemen Romo, 19-anyos, lunsay mga residente sang Barangay 35, matapos sila ang ginaalegar nga gin-abduct sang apat ka wala pa makilal-an nga mga persona.
Suno kay Sarona, santo sa pahayag sang pamilya, nagapamunit ang duha sang hinali lamang ang mga ini nga ginpalapitan sang apat ka mga lalaki kag nag-upod lamang ang mga ini.
Tubtob sa karun, wala pa nakabalik ang duha.
Samtang, suno naman kay Bona Lingco, utod ni Villalon, nakabaton ini sang tawag nagikan sa bata ni Joneil alas 11:00 sang Martes sang gab-i tuhoy sa natabo.
Suno kay Lingco, samtang nagapamunit si Villalon kag Romo, nagapamunit man sa ubos ang witness nga si Michael.
Sa pahayag sang witness, nagasugba sang green shell ang duha sang sila ang ginpalapitan sang apat ka mga persona kag ginhambalan nga sila gale ang nagapanguha sang mga green shell sa lugar.
Nagsabat naman ang mga ini nga ginhatag lamang ini sa ila.
Sila ang gin-agbayan kag ginsipit sang mga suspetsado palayo sa lugar kag pagwa sa mayor nga alagyan pagwa sang Barangay 35 apang wala naman sang pwersa ukon komosyon nga natabo.
Sa karun suno kay Lingco, wala gid sila sang ihibalo kun ano ang natabo sa iya nga utod.
