Ginkumpirmar sang pinuno sang Investigation and Detective Management Unit sang Bacolod City Police Office nga mag-utod ang duha ka lalaki nga nagpatay sa Senior High School Student nga si Nicus Balagusa sa sulod mismo sang kwarto sang iya mga ginikanan sa Granada Ville, Barangay Granada, Bacolod City sang Hunyo 2.
Sa interview sang Bombo Radyo Bacolod kay Police Major Joery Puerto, duha sa lima nga napasakaan sang kaso nga murder ang identified samtang ang tatlo ang John Does bangud wala pa nakilal-an.
Suno kay Puerto ang duha sa napasakaan sang kaso ang mag-utod.
Kalakip sa napasakaan sang kaso ang ginatudlo nga isa sa mga suspek nga Carlito “Dondon” Tongho nga amay sang 16 anyos nga biktima sang rape.
Suno sa pinuno sang Investigation and Detective Management Unit nga napasaka naman ang kaso nga rape batok sa 17 anyos kag 19 anyos nga ginatudlo nga suspek sa pagpanghimulos sa bata ni Tongho.
Sa karun ang tanan nga mga impormasyon nga nagakabaton sang mga kapulisan nga may kaangtanan sa kaso ang ila man nga ginavalidate.
Ginpahayag man ni Puerto nga ang background sang mga suspek ang padayon pa nga ginaimbestigaran kag indi pa mapahayag sa kahanginan bangud man nga mga armado ini.
Nagpanugyan ini sa pamilya nga indi magkahangawa bangud ang kapulisan ang ara man agud nga magsiguro sang ila nga seguridad kag madamo ang nakabantay sa palibot.
Ginpahayag man sini nga ang mga suspek ang indi magkompiyansa bangud may yara na sang nagamonitor sa ila kag ginahimo man ang tanan sang mga kapulisan agud nga malikawan na nga magluntad ang kaangay nga insidente.
