Nagapangatubang na sang kaso nga paglapas sa RA 9165 ukon Comprehensive Dangerous Drugs Act of 2002 ang duha ka mga suspek nga nadakpan sa drug buybust operation sa Barangay Singcang Airport, ciudad sang Bacolod sang Myerkules sang gab-i matapos nga mahingagaw pasaka sang mga kapulisan kagab-i ang kaso.
Madumduman nga nagdangat sa masobra P5.1 million ang balor sang suspected shabu nga narecover sa ginpatigayon nga drug buybust operation sa Purok Mars, Barangay Singcang-Airport, Bacolod City sang Miyerkules sang gab-i.
Ang subject person sa operasyon ang ginkilala nga si George Jayme Jr., 49 anyos, High Value Individual, single, wala sang trabaho kag residente sa Burgos Street, Zone 5, Poblacion sa banwa sang Murcia; kasubong man si Dharryl Escanuela, 41 anyos, street level individual, single, wala sang trabaho, tumandok sang Olongapo City, Zambales, apang temporaryo nga nagapuyo sa Royal Amri Hotel, 13th Street, Barangay 7, Bacolod City.
Narecover ang pito ka transparent plastic sachets kag anom ka big heat sealed transparent plastic sachets sang suspected shabu gikan kay Jayme samtang lima man ka big heat sealed transparent plastic sachets ang narecover kay Escanuela.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 8, nahapunan sila sa pagpasaka sang kaso bangud hapon naman nag-abot ang mga result sang tests nga ginpatigayon sa mga recoveries.
Suno kay Tolentino, sang nagligad pa nga tinuig nila ginamonitor ang giho sang mga suspetsado antes pa man ginpatigayon ang buybust operation.
Gin-athag man sini nga wala sang foreigner sa nadakpan kundi nasal-an lamang si Escanuela sa itsura sini nga daw Americano.// Sa karun ang duha ang nakahunong sa Bacolod Police Station 8 kag nagapangatubang na sang kaso.
