Duha ang naaresto sa bahin sang Western Visayas sa paglapas sang Comelec Gun Ban.
Sa interview sang Bombo Radyo Bacolod kay Police Regional Office 6 spokesperson Police Lt. Col. Arnel Solis, isa nadakpan sa Iloilo City samtan isa man ang nadakpan sa Bacolod City.
Suno diri, alas- 11:35 kagab-i, naaresto si Archie Aragon, 24 anyos, single, wala sang trabaho kag residente sang Purok Arseo, Barangay Mansilingan, Bacolod City.
Nadakpan si Aragon sa bahin sang Brgy 28, Bacolod City kun sa diin nakita ini nga may bitbit nga isa ka unit sang improvise firearm ukon Pogakhang nga loaded sang isa ka live ammunition sang 20 gauge shotgun.
Samtang, nadakpan naman ang 41 anyos nga negosyante nga si alias “Ryan” matapos nga makitaan nga may armas-luthang sa Brgy. Seminario, Jaro, Iloilo City, kahapon, ala- 1:10 sang kaagahon.
Suno kay Solis, nagamaneho sang salakyan ang suspek sang makabunggo ini sa koisko sang balaligyaan sang bibingka.
Sa pagpalapit sang kapulisan nakit-an ang armas luthang as driver’s seat tupad sang suspek.
Sa search nga ginconduct, nakumpiskar ang isa ka 9mm pistol nga may isa ka magazine kag walo ka rounds sang ammunition; isa ka .380 pistol nga may isa ka magazine kag walo man ka rounds sang ammunition; kag isa ka Armalite M15A2 5.56mm rifle nga may pito ka magazine kag 221 ka rounds sang ammunition.
Pahayag ni Solis, ang duha ka nadakpan ang magapangatubang sang kaso nga pagbayolar sa Republic Act 10591 ukon “Comprehensive Firearms and Ammunition Regulation Act” kag COMELEC Gun Ban sa idalum sang Republic Act 7166.
