BACOLOD CITY — Aminado ang miyembro sang technical working group sang Negros Island Region nga indi si Presidente Rodrigo Duterte ang balasulon sa pagkabungkag sang NIR.
Sa Good Morning Philippines Program sang Bombo Radyo Bacolod, ginpahayag ni Dr. Ma. Lina Sanogal, coordinator sang Provincial Planning and Development Office, nga indi kay Duterte ang desisyon nga tunawon ang NIR kundi iya sang mga economic managers sang Malacañang.
Kalakip sa mga ini ang National Economic and Development Authority kag ang Department of Budget and Management sa pagpamuno ni Secretary Benjamin Diokno.
Si Diokno ang una nga nagpahayag sang nagligad nga tuig nga pilirmahan nalang ni Duterte ang Executive Order nga maga-dissolve sang NIR apang naglawig sang malapit isa ka tuig antes napirmahan ang EO 38 nga nagpawalang-bisa sa EO 183 ni anay Presidente Noynoy Aquino.
Suno kay Sanogal, mas maayo man kuntani kun wala gindula ang NIR bangud isa ini ka maayo nga ehemplo sa ginaduso sang presidente nga federalismo bangud nasarangan sini nga magtindog bisan ginalakipan lamang sang duha ka mga probinsya apang wala na sang mahimo ang rehiyon bangud pirmado na ang Executive Order.
