Gin-anunsyar ni Negros Occidental Governor Eugenio Jose “Bong” Lacson nga imodify sang provincial government ang implementasyon sang enhanced community quarantine.
Sa press conference nga ginpatigayon sang gobernador paagi sa online streaming, ginpahayag sini nga ila nadesisyunan sa ginpatigayon nga consultative meeting upod ang mga local chief executives sa probinsya nga padayunon ang ECQ tubtob sa Abril 30.
Apang may yara sang pila ka mga pagbag-o ukon modifications lakip na ang pagpahanugot sa mga tricycle kag trisikad nga magbiyahe umpisa Abril 20.
Suno kay Lacson, ang mga tricycle kag trisikad drivers ang pila sa mga naigo gid nga sektor matapos ang implementasyon sang ECQ sa probinsya sang Marso 30.
Paathag ni Lacson, ang mga tricycle ang tugutan nga magbiyahe nga may yara sang tatlo lamang ka mga pasahero samtang ang trisikad naman ang dapat isa lang ka pasahero.
Gin-athag naman ni Lacson nga indi sa gihapon pwede makabiyahe ang mga jeepney kag mga bus.
Magluwas diri, tugutan man ang mga construction projects sa probinsya.
Gina-engganyo naman ni Lacson ang mga hardware kag vehicle parts stores nga magbukas.
Samtang, magadepende naman sa kada local government units (LGUs) ang pagpatuman sang curfew.
