Nagdangat na sa kapin 200 million dollars ang natipon sang election campaign ni US Vice President Kamala Harris kag nakatipon sang 170,000 nga perma sang bag-o nga volunteers humalin sang siya ang nangin presidential candidate sang Democratic Party.
Sang tinalikdan nga semana, nagwithdraw na si President Joe Biden sa iya re-election bid kag gin-endorso si Harris para sa November 5 elections batok kay Republican former President Donald Trump.
Sa mga polls nga ginpatigayon sang tinalikdan nga semana, nagwa nga tied na si Harris kag Trump kag nagset sang stage para sa isa ka close-fought campaign masobra 100 ka adlaw na lamang ang nabilin antes ang eleksyon.
Una na nga ginpahayag sang kampo ni Trump sang Hulyo nga nakatipon ini sang 331 million dollars sa ikaduha nga quarter kag nalapawan ang campaign ni Biden nga 264 million dollars kag sang mga kaalyado sini sa Democrats sa kaangay nga period.
Si Harris ang nakasecure na sang suporta nagikan sa majority sang mga delegates sa Democratic National Convention, kag ginalantaw nga posible siya ang mangin nominee sang partido para sa pagka-presidente sa masunod nga bulan.
