Malapit na lang kilalahon bilang pinaka-una nga trillionaire sa bug-os nga kalibutan ang nagapanguna man sa karun nga bilyonaryo nga si Elon Musk.
Siya ang pinakauna nga tawo nga naka-achieve sang net worth nga $500 billion.
Ang 54 anyos nga bilyonaryo nakuha ang $500.1 billion nga net worth sang Miyerkules antes ini nanaog sa $499.1 billion.
Nagasunod sa iya amo ang CEO sang Oracle nga si Larry Ellison nga may net worth nga $350.7 billion kag ginasundan ni Meta CEO Mark Zuckerberg nga may net worth nga $245.8 billion.
Antes maggradwar sa University of Pennsylvania kag nagdrop out sa Stanford University, una nga nabaton ni Musk ang iya milyones nga kwarta sang ginbaligya niya ang online publishing software company sa US computer maker nga Compaq sa masobra $300 million sang 1999.
Ang sunod sini nga kompanya nagmerge sa Paypal kag matapos ini, ang South African tech entrepreneur nagpatukod sang space rocket company nga SpaceX sang 2002 kag nangin chairman sang electric carmaker nga Tesla sang 2004.
