BACOLOD CITY — Naatrasar ang pagpanyaga sang mga estudyante sang Trinity Christian School sa ciudad sang Bacolod bangud sang bomb threat kaina sang udto.
Ginpahayag nga may nanawag sa eskwelahan kag nagpamahog nga palukpon sini ang buluthuan.
Bangud sini, gilayon nga nanawag ang tagdumalahan sa Police Station 4 nga madasig man nga nagresponder.
Una nagpinsar ang mga ginikanan nga may fire drill lamang sa eskwelahan apang nagduda na ang mga ini sang wala gihapon ginbuy-an ang mga estudyante sa pihak nga manugtapos na ang lunch break.
Suno kay Police Senior Insp. Elmer Bonilla, hepe sang Police Station 4, ila gintipon ang mga estudyante sa elementary kag high school sa covered court sang eskwelahan samtang ginpausisa sa bomb expert nga si Demy Montoya ang bilog nga campus.
Apang pagkaligad sang isa ka oras nga pagpangusisa, nangin negatibo sa bomba ang bilog nga eskwelahan.
Gindayaw naman ni Senior Insp. Bonilla ang mga estudyante sang Trinity bangud nangin alerto ang mga ini nga resulta sang masami nga pagpatigayon sang fire drill sa eskwelahan.
